Isertitat

Aallaaviusumik ilaqutariinni meeqqap najugaqarfigisaani ukioq meeqqanut tapisiaqarfik ukiunik marlunnik sioqqullugu isertitaasut akileraarutigineqartussaatitaasut meeqqanut tapisiaqarnissami tunngavigineqassapput. 2003-mi meeqqanut tapit naatsorsorneqassapput 2001-imi isertitat akileraarutigineqartussaatitaasut tunngavigalugit.

1. Meeqqap angajoqqaani tamaasa najugaqatigippagit taakku ataatsimut isertitaat akileraarutigineqartussaatitaasut tunngavigalugit meeqqanut tapit tunniunneqassapput.
2. Meeqqap angajoqqaami aappaa najugaqatigippagu taassuma isertitai akileraarutigineqartussaatitaasut tunngavigalugit meeqqanut tapit tunniunneqassapput. Angajoqqaaq inooqatigisaminik najugaqateqarpat imaluunniit katissimappat aappaasup imaluunniit inooqataasup isertitai ilanngullugit naatsorsuunneqassapput, taanna meeqqamut pilersuisussaatitaanngikkaluarpalluunniit. Taamaattoq angajoqqaap inooqammik inooqateqarnera ukioq meeqqanut tapisiaqarfiusoq sioqqullugu ukioq ataaseq sinnerlugu sivisussuseqarsimassaaq, inooqataasup isertitai meeqqanut tapisiaqarsinnaanermi ilanngullugit naatsorsuunneqassappata. Inooqataasutut paasineqassaaq inuk angajoqqaap aapparalugu inooqataa.
3. Meeraq namminerisamik ilaqutariinnut inissitaasimappat angajoqqaarsiat meeqqamik paarsinissamut akuersissummik atuuttumik akuersissuteqarpata taakku isertitaat tunngavigalugit meeqqanut tapisiassat tunniunneqassapput. "Angajoqqaarsiat" paarsinissamut akuersissummik atuuttumik peqanngippata malittarisassaq pingaarneq malillugu meeqqanut tapisiassat naatsorsorneqassapput, ima paasillugu angajoqqaat isertitaat tunngavigalugit.
4. Meeraq atuarfiup angerlarsimaffiutaani assigisaaniluunniit najugaqarpat meeqqanut tapisiassat angajoqqaap meeqqap kingullermik nalunaarsorsimaffigisaata isertitai tunngavigalugit naatsorsorneqassapput. Meeraq atuarfiup angerlarsimaffiutaani assigisaaniluunniit ineqalernissaa sioqqullugu namminerisamik ilaqutariinnur inissitaasimappat meeqqap kommunimi angerlarsimaffigisaani isumaginninnermi ataatsimiititaliaq aalajangiisinnaavoq siusinnerusukkut angajoqqaarsiarisat isertitaat tunngavigalugit meeqqanut tapisiaqartitsisoqassasoq. Tamanna amerlanertigut pisinnaasarpoq meeqqap angajoqqaavini attaveqarfiginagit siusinnerusukkut angajoqqaarsiarisani suli attavigippagit.
5. Angajoqqaat najugaqatigiinngippata meerarlu angajoqqaani sivisoqatigiimmik najugaqarfigisarpagit meeqqanut tapisiassat angajoqqaap meeqqamut akilersuutinik tigusartagaqarsinnaasup isertitai tunngavigalugit tunniunneqassapput. Angajoqqaat arlaannaalluunniit meeqqamut akilersuutinik akiliisanngippata angajoqqaap meeqqap tapisinerani siullermi meeqqap inuit aqqisa allattorsimaffiatigut nalunaarsorsimaffigisaata isertitai tunngavigalugit meeqqanut tapisiassat tunniunneqassapput.

Inuup isertitani akileraaruteqaataasussat malunnartumik ataavartumillu appariaateqarsimasut uppernarsarsinnaappagu isumaginninnermi ataatsimiititaliap qaqutigoortumik aalajangiussinnaavaa isertitassatut akileraaruteqaataasussatut naatsorsuutigineqartut tunngavigalugit meeqqanut tapisiaqartitsisoqassasoq.

Tunngaviusumik malittarisassaasut pillugit annertunerusumik atuarit saqqaani attataasaq Inatsit tunngaviusoq tooriarlugu.